Uzluksiz ta'lim tizimida biologiyani o'qitishni takomillashtirish va yanada demokratlashtirish, uning samarasini oshirish ko'p jihatdan o'qituvchining kasbiy tayyorgarligi darajasiga bog'liq. Qo'lingizdagi kitob biologiya o'qituvchisining ilmiy-nazariy, metodik va psixologik tayyorgarligini oshirish maqsadida yozilgan. Mazkur o'quv-metodik qo'llanmada zoologiyani o'qitish jarayonida foydalanish mumkin bo'lgan zamonaviy o'qitish metodlari va pedagogik texnologiyalari yoritilgan. Unda o'quv jarayonini o'quvchilarning mustaqil o'qishi, o'z-o'zini baholashi va olgan bilimlarini o'zlari nazorat qilishi asosida tashkil etishga asosiy e'tibor berilgan. Ana shu maqsadda laboratoriya darslarini modulli o'qitish texnologiyasi asosida olib borish tavsiya etiladi. Bir qancha mavzular yuzasidan didaktik o'yinlar ssenariylari ishlab chiqilgan. O'quvchilarning darslik ustida mustaqil ishlashi va o'z-o'zini baholashlari uchun ko'p tanlov javobli test topshiriqlari va muammoli savollar keltirilgan.
